Cariad yn y Manylion – Candelas
Mae label recordiau I KA CHING yn hynod falch o ryddhau ‘Cariad yn y Manylion’ ar 23.05.25, sef ail sengl Candelas oddi ar eu halbwm hir-ddisgwyliedig.
Dyma gân lle ma’r teitl yn dweud y cyfan. Mae hi’n sôn am berthnasau yn gyffredinol a pha mor bwysig ydi gwneud y pethau bychan, manwl er mwyn cadw pawb yn hapus. Hawdd iawn ydi anghofio hyn o fewn amserlen wythnosol, undonog y rhan fwya’ ohona ni; ond mae’n bwysig gwrando ar eiriau Dewi Sant bob tro!
Mae Candelas wedi bod yn gigio hon ers rhyw flwyddyn a dydi’r band ddim yn cofio cael ymateb cystal i gân yn fyw. Dywed Osian ei bod hi’n “braf clymu sain trwm Candelas hefo gogwydd mwy cadarnhaol arno fo – a dyma ydi’r gobaith am yr albwm newydd i gyd.”
Rhyddhawyd ‘Y Gyllell Lemon’ – sengl Strokes-esque gan y band a fydd yn ymddangos ar yr albwm newydd – nôl ddechrau’r flwyddyn. Candelas yw un o brif fandiau sefydledig Cymru, ac maent fel arfer, yn brysur yn gigio dros gyfnod yr haf.
