Albwm Hir Ddisgwyliedig Sŵnami

Bydd Sŵnami yn rhyddhau eu halbwm cyntaf hir ddisgwyliedig, ar y 3ydd o Awst 2015 ar label Ikaching. Cawsom addewid o’r cynnwys gyda’r senglau Cynnydd a Gwenwyn, ac o’r diwedd mae albwm sy’n dwyn yr un enw a’r band, yma i siglo’r haf. Pop gafaelgar, bachog wedi’i adeiladu’n grefftus o haenau o synau anferth.

Wedi llafurio am flwyddyn ar ‘Sŵnami’, ceir yma albwm o synth-pop uniongyrchol. Pop sydd efallai’n fwy personol nag o’r blaen, meddai’r band, ond eto’n llai amwys. Clywsom ragflas o’r sŵn ar y trac ‘Magnet’ a chwaraewyd yn syth ar Radio 1 pan oedd Sŵnami ar eu ffordd i Groningen i gynrychioli’r stesion radio yng Ngŵyl Eurosonic.

Mynd yn ôl at Rich Roberts i Stiwdio Ferlas wnaeth yr hogiau, ond gan fentro cyd-gynhyrchu y tro hwn. Gwelwyd Gruff Jones (synth) yn cyd-gyfansoddi gydag Ifan Davies (llais a gitâr) ac Ifan Ywain (gitâr), gan weu ei ddylanwadau synth-aidd i’r gymysgedd. Er ei fod yn Awstralia, rhaid oedd gwneud yn siŵr fod un o aelodau gwreiddiol y band, Huw Ynyr, yn rhan o ‘Sŵnami’. Llwyddwyd i recordio ei lais mewn stiwdio yno, er mwyn cyfrannu at leisiau cefndirol yr albwm.